Plattcast

Plattdüütsch ut Plattdüütschland

Plattcast header image 2

Akschoon in Neddersassen: Fredag is Plattdag

10.08.2016 · Keine Kommentare

 

Landeswied Aktion för Plattdüütsch von de 2. bit to de 30. September: De meeste Minschen in Nedersassen wünschen sük mehr Stöön för de „lüttje Spraken“ van dat Land – Plattdüütsch un Saterfreesk. Unner dat Motto „Fredag is Plattdag“ of „Fräindai is Seelterdai“ worden nu all Nedersassen daarto anhollen, so faak un so vööl as ‘t geiht Plattdüütsch of Saterfreesk to proten.

„Well noch keen Platt bzw. Saterfreesk proten kann, sull dat an de Fredagen in Septembermaant utproberen“, so de Idee van de Erfinder van de Aktion, Schoolraad Manfred Kück ut Cuxhaven. Oll Hasen, de de Spraak al könen, worden daarto anhollen, fredags so vööl Platt to proten as dat eets geiht – ok mit Lüü, mit de se anners Hoogdüütsch proten. Dör de trankiele Umgang mit de Regionaalspraak kunn man de „Rang van de Spraken maal up d‘ Kopp stellen, anner Plattproters in sien Umto finnen un Platt publik maken“, see Mitorganisator Cay Hendryk Meyer van de Oberschool Westerstee. De Vörutsettens daarför sünd daar: Plattdüütsch verstahn könen de meeste Nedersassen, so as se seggen, dat wiesen ok de Umfragen. All Platt- un Freeskproters sünd daarum van Harten inladen, sük to bedeligen un de Spraak eenfach „in de Mund to nehmen“.

Ok de Scholen sünd to Mitmaken inladen. Daarum hett de Landesschoolbehörde al in de Midde van Junimaant all Scholen in ‘t Land anschreven, dat Mesters/-kes, Plattproters un Betreuungspersonaal informeert un to Mitmaken motiveert worden. De Scholen könen sük mit verscheden Projekten – t. B. Spillen, Musik, Theater, Vördragen – of ok eenfach mit plattdüütsche Andelen in de normaal Unnerricht bedeligen. Ideen daarto gifft dat unner www.schoolmester.de.

Materiaal to Mitmaken so as Plakaten, Postkaarten usw. geven de deelnehmende Landschaften un Landschaftverbände an all, de daar Interess an hebben, rut. De Adressen daarto finnen Ji unner www.platt-is-cool.de.

„Fredag is Plattdag – Fräindag is Seelterdai“ is de neeiste Initiative van Platt is cool, en gemeensaam Projekt van Landschaften un Landschaftsverbände in Nedersassen un de Nedersasske Landesschoolbehörde. Wo cool Platt wesen kann, hebben vör körten de Deelnehmers van dat Modellprojekt för frohe Mehrsprakigheid, dat van dat nedersasske Kultusministerium fördert word, wiest. Bi en Veranstalten mit de Titel „Satersk! Platt! – Wi könen dat!“ in dat Neei Theater in Emden hebben de Wichter un Jungse ut verscheden Scholen van Oostfreesland un dat Saterland up de Bühne mit Sketchen, Spillen, Leden un Theaterupföhrens för en heel Bült Pläseer sörgt – up Platt un up Freesk.

Tags: Aktuelles · Kultur

0 Antworten bis jetzt ↓

  • Es wurden noch keine Kommentare abgegeben...

Hinterlasse einen Kommentar